रुकुम पूर्वको सिस्ने गाउँपालिकामा कार्यरत कोइली शाही आफ्नै कोठामा मृत अवस्थामा फेला परेकी छन् । गाउँपालिकाको प्रशासन शाखामा कार्यरत कार्यालय सहायक शाहीको शव सिस्ने गाउँपालिका ५ स्थित आफ्नै कोठामा भेटिएको छ ।

वडा नम्वर ६, खोपीचारकी २३ वर्षीया शाही झुण्डिएको अवस्थामा फेला परेको जिल्ला प्रहरी कार्यालय रुकुम पूर्वले जनाएको छ । डिएसपी उमाशंकर प्रसाद यादवका अनुसार शाही भाडामा बस्दै आएकी थिइन् ।

घुम्न जाने योजना बनाएका उनका महिला साथीहरुले फोन गर्दा नउठेपछि आसपासका चिनजानका मानिसलाई फोन गरेर सोधपुछ गरेका थिए । कोठामा पुगेर स्थानीयले बोलाउँदा कुनै संकेत फेला नपरेपछि बिहान ९ बजेको समयमा प्रहरीलाई सूचना दिइएको थियो ।

प्रहरी टोली पुगेर हेर्दा कोठाभित्र झुण्डिएको अवस्थामा शव फेला परेको बताइन्छ । घटना गएराति नै भएको हुनसक्ने प्रहरीको अनुमान छ । शाहीको शव पोष्टमार्टमको लागि जिल्ला अस्पतालमा राखिएको छ । पोष्टमार्टमपछि मात्रै मृत्युको कारण खुल्ने प्रहरीको भनाइ छ ।