धरान उपमहानगरपालिकाको वडा नम्बर- ४ का वडाध्यक्ष धनबहादुर राईलाई पदबाट बर्खास्त गर्न नेकपा (एमाले) धरानले सिफारिस गरेको छ। मेयर हर्क साम्पाङले चलाएको श्रमदानमा सहभागी भएको विषयलाई पनि कारबाहीको कारणका रूपमा उल्लेख गरिएको छ।

एमाले धरानका उपाध्यक्ष पारस काङमाङ राईका अनुसार वडाध्यक्ष राईले पार्टी हितविपरीत काम गरेको भन्दै पार्टीको जिल्ला कमिटी समक्ष कारबाहीका लागि सिफारिस गरिएको हो।

उपाध्यक्ष पारसले पार्टीका नेताहरूले पटक-पटक सम्झाउँदा पनि नमानेको र तीन पटक स्पष्टीकरण सोध्दा समेत चित्त बुझ्दो जवाफ नपाएपछि निर्वाचन आयोगमा बर्खास्त गर्न कारबाही सिफारिस गरिएको बताएका छन्।

धनबहादुरलाई कारबाही सिफारिस गरिएको विषयमा एमाले जिल्ला कमिटीका कार्यवाहक अध्यक्ष पर्सुराम यादवले धनबहादुरलाई एकपटक पार्टी कार्यालय बोलाएर कारबाही प्रक्रिया अगाडि बढाउने बताएका छन्।