धरान उपमहानगरपालिका–१६ मा श्रमदान कार्यक्रमका क्रममा १२ वर्षीया बालिकामाथि यौन दुर्व्यवहार भएको आरोपमा ४९ वर्षीय खगेन्द्र राई पक्राउ परेका छन्।

धरान बहुभाषिक पाठशाला निर्माणका लागि भइरहेको श्रमदानमा सहभागी राईमाथि बालिकालाई फकाएर खोल्सातिर लगेर हातपात गर्ने प्रयास गरेको आरोप लागेको हो। बालिका आफ्नी आमासँगै श्रमदानमा सहभागी भएकी थिइन्।

पीडित परिवारले इलाका प्रहरी कार्यालय धरानमा किटानी जाहेरी दिएपछि धरान–१७ पृथ्वीचोकका राईलाई प्रहरीले पक्राउ गरेको हो।

राई श्रमदानमा खटिएका स्वयंसेवकलाई खाना पकाउने जिम्मेवारीमा थिए। घटना भएका बेला मेयर हर्क साम्पाङ भने घटनास्थलमा थिएनन्।

प्रहरीका अनुसार पीडकलाई भगाउन सहयोग गरेको आरोपमा अन्य दुईजनाविरुद्ध समेत जाहेरी परेको छ। घटनाबारे थप अनुसन्धान भइरहेको इलाका प्रहरी कार्यालय धरानले जनाएको छ।

यो विषय बाहिर आएलगत्तै गत शुक्रबार साम्पाङले फेसबुकमा स्टाटस लेख्दै घटना प्रमाणित भए आफूले कारबाही गर्ने बताएका थिए । साथै, उनले चेतावनी दिँदै भनेका थिए, ‘यदि यस्तो होइन रहेछ भने आरोप लगाउनेले माफी मागेर कसले यस्तो भन्न लगाएको हो बाहिर ल्याइदिनुपर्छ ।’

यौन दुर्व्यवहार जस्तो अपराधमा मेयर आफैँले सुनुवाइ गर्ने भनेर दबाब दिएपछि न्यायका लागि प्रहरी गुहारेको पीडितका परिवारको भनाइ छ । धरान १६ का वडाअध्यक्ष मुरारी भट्टराईले मेयरले आफ्नो अधिकार क्षेत्रभन्दा बाहिर गएर कारबाहीको चेतावनी दिएको बताए ।

यो स्टाटस विवादित भएपछि साम्पाङले हटाए । यस विषयमा अहिले उनी नयाँ प्रष्टीकरण दिइरहेका छन् । हिजो फेसबुक लाइभमा आएर यस सम्वन्धमा आफ्नो भनाइ राखेका थिए ।