म्याग्दीबाट आमासँगै हराउनुभएका राजकुमार राईले ३६ बर्षपछि परिवारको खोजी गर्नुभएको छ । अन्दाजी ६ बर्षको उमेरमा आमा र बुबाको झगडा भएपछि आमासँगै मामाघर जाने भनेर घरबाट हिड्नुभएका राजकुमारले आफ्नो घर म्याग्दीमा भएको दावी गर्नुभयो ।
मोरङ जिल्लाको मंगलबारेमा भेटिनुभएका ४१ बर्षिय राईले रात्रीबसमा आउँदै गर्दा हराएको बताउँदै आफ्नो परिवार बेनीबजार आसपासका क्षेत्रमा रहेको बताउनुभयो।
बुबा र आमा झगडा भएपछि करिब डेढ घण्टा हिडेर सदरमुकाम बेनीबजारमा आएर रात्री बसमा चढेको र बसबाट निस्किने बेलामा आमासँग छुटेको सम्झना रहेको राजकुमारले बताउनुभयो । ‘मेरो घर म्याग्दीमै हो, मेरो दिदीको नाम कुमारी राई हो, मेरा भाई पनि छ’ राजकुमारले भन्नुभयो।
बाल्यकालमा दिदी कुमारीसँगै विद्यालय गएको र घरबाट विद्यालय करिब १५ मिनेटमा रहेको समेत बताउनुभयो । ‘आमासँगै जंगलमा हिडेर बेनीबजार आएको थिए, अहिले पनि आउँदै गरेको बाटो याद हुन्छ’ राजकुमारले भन्नुभयो । विगतमा पनि बेनीबजार आउने प्रयास गरेपनि सफल नभएको बताउनुभयो ।
राजकुमारका अनुसार उहाँका हजुरबुवाले राई भाषा समेत बोल्नुहुन्थ्यो। घरमा हजुरबुबा, बुबा, मुखले नबोल्ने दाई, दिदी र एउटा भाई समेत रहेको राजकुमारको भनाई छ । दिदी कुमारीले धेरै मायाँ गर्ने गरेको बताउँदै आफ्नो परिवारका सदस्य भेट्न बेनी आउने बताउनुभयो । राजकुमारका अनुसार घर आसपासका क्षेत्रमा पानी खाने कुवा समेत रहेको छ ।
प्रतिक्रिया
सम्बन्धित खवर
