शुक्रवार राति बूढानीलकण्ठस्थित घरमा भारतीय नागरिक ५४ वर्षीय परम नारायण गिल मृत फेला परे । पन्जाबको चण्डीगढ घर भएका उनले विवाह लगायत समारोहका फोटो खिच्ने पेशा गर्दै आएका थिए ।
उनको घरमा काम गर्ने अन्जना तामाङ पनि मृत अवस्थामा भेटिइन् । २८ वर्षीया तामाङ धादिङको गल्छी गाउँपालिका–६ की हुन् ।
गिलले भाडामा लिएको घरमा काम सकेर साँझ ५ बजे सधैँ आफ्नो डेरामा फर्किने अन्जना लामो समय नफर्केपछि उनकी बहिनी उनलाई खोज्न गइन् । सो घरमा बत्ती बलिरहेको थियो तर, भित्रबाट चुकुल लगाएको देखेपछि बहिनीले प्रहरीलाई खबर गर्दा दुवै जना मृत भेटिए ।
अञ्जनाको टाउको चोट देखिएको छ । बुढानलीकण्ठ नगरपालिका–४ पासिकोट स्थित थ्री स्टार किड्स जोन स्कुलको कम्पाउन्ड भित्रको घरमा उनीहरूको शव सँगै विषादीको बट्टा भेटिएको छ । अन्जनाको हत्यापछि गिलले आत्महत्या गरेको हुनसक्ने जिल्ला प्रहरी परिसर काठमाडौँका एसपी अपिल बोहराले बताए ।
उनले भने, ‘दुई वटा विषको बट्टा खोलेको अवस्थामा भेटिएको छ ।’ त्रिवि शिक्षण अस्पतालका चिकित्सकहरूले पनि गिलले विषादी सेवन गरेको प्रारम्भिक जानकारी प्रहरीलाई गराएका छन् ।
गिलकी पत्नी विदेशमा बस्छिन् । छोरीको विवाह भैसकेको छ । अञ्जनाका श्रीमान् पनि विदेशमा छन्, उनी दुई सन्तानसँग बूढानीलकण्ठमा बस्छिन् । अनुसन्धानमा संलग्न एक जना अधिकृतका अनुसार अञ्जनाका श्रीमान् बिदा सकेर ३ दिनअघि मात्र विदेश फर्केका थिए ।
शुक्रवार राति ९ बजेर ४० मिनेटमा खबर पाएपछि प्रहरीले त्यसबारे अनुसन्धान गरिरहेको छ । घटनास्थलमा कुकुर पनि मृत भेटिएको छ । कुकुरलाई विष खुवाएर वा हिर्काएर मारेको आशंका गरिएको छ । एसपी बोहरा भन्छन्, ‘कुकुरलाई पनि चोट लागेको देखिन्छ ।’
घटनास्थलमा ह्यामर फेला परेको छ । अञ्जनालाई गिलले ह्यामरले हिर्काएको प्रहरीको प्रारम्भिक अनुसन्धान निष्कर्ष छ ।
ढोका भित्रबाट चुकुल लगाएको हुनाले बाहिरबाट तेस्रो व्यक्तिको प्रवेश भएको नदेखिएको प्रहरी वृत्त महाराजगञ्जका डीएसपी निरञ्जन थापाले बताए । उनले भने, ‘हामी ढोका फोडेर घटनास्थलमा प्रवेश गरेका हौँ, अहिलेसम्मको अनुसन्धानमा तेस्रो व्यक्तिको प्रवेश देखिँदैन ।’
