रामेछापको रामेछाप नगरपालिका वडा नं ८ सल्लेका सन्तोष कुमार तामाङ्गको साउदी अरबमा सवारी दुर्घटनामापरी मृत्यु भएको छ । यहि जेठ १८ गते सवारी चालक रहेका तामाङ्गको दुर्घटनामापरी ज्यान गएको उनको परिवारीक श्रोतले जानकारी दिएको छ ।
३४ वर्षिय तामाङ्ग रोजगारीको शिलशिलामा विगत ३ महिनादेखी साउदीमा सवारी चालकको रुपमा कार्यरत थिए । मृतक तामाङ्गका भाई तिर्थ तामाङ्गका अनुसार दाजुको शव नेपाल ल्याउन पहल भैरहेको छ । तर उनि कार्यरत कम्पनी खराब भएको कारण शव ल्याउन समस्या भएको हो ।
९ महिना अघि आमाको मृत्यु भएको भन्दै तामाङ्गले अहिले अचानक दाईको मृत्युले परिवार शोकमा डुबेको बताउनुभयो । उहाँले भन्नुभयो,“आमा हामीलाई छोडेर जानुभयो,उहाँको उपचारका लागि हामीले ५० लाखभन्दा बढी खर्च गर्यौं,ऋण लियौँ ,घर,गहना सबै बेच्यौं, तर पनि बचाउन सकिएन । त्यो पीडा अझै मनमा थियो,अहिले फेरि त्यो नसुकेको घाउमा अर्को बज्रपात पर्यो ।”
मृतक तामाङ्गको ३ जना साना छोरीहरू छन । छोरीहरुले बाबाको काख खोजिरहेको तिर्थले भावुक हुँदै बताउनुभयो । ऋण र शोकमा डुबेका तामाङ्ग परिवारले आफुले सकेको सहयोग गरिदिन अपिल गरेका छन ।
