प्रहरीले अनलाइन बेटिङ (सट्टेबाजी) खेलाएको आरोपमा १७ जनालाई पक्राउ गरेको छ । काठमाडौं उपत्यका अपराध अनुसन्धान कार्यालयको टोलीले सोमबार राति ललितपुरको नख्खुस्थित सनराइज अपार्टमेन्ट र धापाखेलबाट पक्राउ गरेको हो ।
कार्यालयका प्रवक्ता एवंम् प्रहरी उपरीक्षक (एसपी) काजीकुमार आचार्यका अनुसार पक्राउ पर्नेमध्ये पाँच जना भारतीय नागरिक छन् । बाँकी सबै जना नेपाली नागरिक हुन् ।
पक्राउ पर्ने भारतीय नागरिकहरुमा ऋषभ राज, दिपककुमार सिंह, अंकितकुमार सिंह, धिरजकुमार सिंह र मोहितकुमार सिंह छन् ।
त्यसैगरी पक्राउ पर्ने नेपालीहरुमा डाइमण्ड कुँवर, मनोज बोगटी, राजेन्द्रबहादुर महता, अरविनकुमार खड्का, विष्णुकुमार राउत, ठक्कर कुँवर, तिलक खड्का, जोर्डन भन्ने जीतबहादुर महतो, सुवास खड्का, विकास थापा, हर्कबहादुर खड्का र पूर्णबहादुर दर्लामी मगर छन् ।
विशेषगरी उनीहरूले आइपिएल, जस्ता विभिन्न खेलमा बेटिङमा लगाउने गरेको प्रहरीको प्रारम्भिक अनुसन्धानमा देखिएको छ।
उनीहरू पछिल्लो पाँच महिनादेखि ललितपुरमा रहेर सट्टेबाजी खेलाइरहेको प्रहरीको भनाइ छ । यस अवधिमा झण्डै ८१ करोडको कारोबार देखिएको एसपी आचार्यले बताए ।
यही समूहले पहिले संयुत्तः अरब इमिरेट्स (युएई)मा पनि सट्टेबाजी खेलाउने गरेको पनि प्रहरीको अनुसन्धानमा खुलेको छ । उनीहरुमाथि थप अनुसन्धान भइरहेको प्रहरीले जनाएको छ ।
