झापाको शिवसताक्षी नगरपालिका वडा नं. ७, लालपानी मण्डलबस्तिस्थित कृष्ण मण्डलको मकैबारीमा मानव कङ्गाल फेला परेको छ। मिति २०८२ जेठ १६ गते (बिहीबार) अन्दाजी १६:०० बजेको समयमा स्थानियले मकैबारीमा कङ्गाल देखेपछि प्रहरीलाई खबर गरेका थिए।

सूचना प्राप्त लगत्तै घटनास्थलमा पुगेको प्रहरी टोलीले सडेको अवस्थामा रहेको पुरुषको कङ्गाल फेला पारेको थियो। प्रारम्भिक अनुसन्धानमा उक्त कङ्गाल सोही क्षेत्रका ऐ.ऐ. बस्ने भिम श्रेष्ठका छोरा अन्दाजी ४४ वर्षीय ओम प्रकाश श्रेष्ठको भएको खुलेको छ। श्रेष्ठ मानसिक रूपमा असन्तुलित रहेको र मिति २०८२ जेठ १ गते घरबाट हिँडी हराएको जनाइएको छ।

उनको हराइरहेको सम्बन्धमा मिति २०८२ जेठ ३ गते इलाका प्रहरी कार्यालय झिलझिलेमार्फत हुलिया निवेदन समेत दर्ता गरिएको थियो।कङ्गालको पहिचान उनले लगाएको कपडा र पहिरनको आधारमा आफन्तजनले गरेका हुन्।

प्रहरीका अनुसार घटनास्थलको सम्पूर्ण कानूनी प्रक्रिया पूरा गरी शवलाई थप परीक्षण (पोष्टमार्टम) का लागि धरानस्थित बी.पी. कोइराला स्वास्थ्य विज्ञान प्रतिष्ठान (घोपा) पठाइएको छ।यस सम्बन्धमा थप अनुसन्धान जारी रहेको प्रहरी कार्यालयले जनाएको छ।