प्रमुख प्रतिपक्षी दल नेकपा माओवादी केन्द्रका प्रमुख सचेतक हितराज पाण्डेले आफूहरूले अवरोध हिजोको लागि मात्रै रोकिएको भएपनि अब निरन्तर अघि बढ्न बताएका छन् ।
सभामुख देवराज घिमिरेले दलका मुख्य सचेतक र प्रमुख सचेतकहरूसँग गरेको छलफलमा विपक्षी दलका प्रमुख सचेतकले भिजिट भिसा प्रकरणमा गृहमन्त्रीको राजीनामा अडान कायमै राखेका छन् ।
उनले भने, ‘देश, जनता र संविधानविरोधी गतिविधिलाई मध्यनजर गरेर हामीले हिजो अवरोध हटाएका हौँ । हाम्रो अडान कायमै छ । यो मानव तस्करी र भ्रष्टाचारसँग सम्बन्धित छ । करेक्सन नगरी हामी अडानबाट ब्याक हुँदैनौं भनेका छौँ । यो विषय सदनमा उठाउँछौँ । अब बाँकी काम सरकार हो ।’
उनले हिजो खुकुलो गर्यो भन्दैमा अबका दिनमा पनि त्यही नसोच्न सरकारलाई चेतावनी दिए ।
रास्वपाका प्रमुख सचेतक सन्तोष परियारले पनि काम गर्न बाहिर गएका आम नागरिकहरूलाई दु:ख दिने, मानव तस्करसँगसम्म जोडिएको घटनामा सरकार गम्भीर भएको भन्दै आपत्ति जनाए ।
उनले भने, ‘उहाँहरूले केही भएको छैन भन्दै नियमित प्रक्रियाबाट जान खोज्दै हुनुहुन्छ । हामीले आफ्नो कुरा राखेका छौँ । हिजो जिम्मेवारीबोध गरेर छाडेका हौँ । रास्वपासहित सबै विपक्षी दल आन्दोलनमा छौँ । आन्दोलनको माग सम्बोधन नभएसम्म हामी सदन अगाडि बढाउन सक्दैनौँ ।’
उनले गृहमन्त्रीको राजीनामा, प्रधानमन्त्रीको जवाफ र उच्चस्तरीय छानबिन आयोगको मागबाट आफूहरू पछि नहटेको बताए ।
