बेपत्ता ममता काफ्लेलाई उनकै श्रीमानले हत्या गरेको पुष्टि भएको छ । ममताको हत्या गर्न नरेश भाटले तीनवटा चक्कु र सरसफाइका सामग्री फरक–फरक स्थानबाट खरिद गरेको र शव घरबाट घिसारेर निकालेको खुलाशा भएको छ । किनेका तीनवटा चक्कुमध्ये २ वटा फेला नपरेको जनाइएको छ । अनुसन्धानकर्ताहरुले मास्टर बेडरूम र बाथरुममा रगतका टाटाजस्ता देखिने प्रमाणहरु पनि फेला परेको छन् ।

ममता काफले जुलाई ३० मा घरभित्रै मारिएको प्रहरीले विश्वास गरेको छ । अदालती कागजात अनुशार ममता काफ्लेका श्रीमान नरेश भाटले नै घरमा उनको हत्या गरेको र शव पछि घरबाट हटाइएको प्रहरीले विश्वास गरेको छ । ३० जुलाई २०२४ वा त्यसको आसपासमा आरोपी नरेश भाटले आफ्नी श्रीमती ममता भाटको हत्या गरेको र घटना उनकै निवासमा भएको प्रहरीले अदालतमा पेश गरेको कागजातमा उल्लेख छ ।

अनुसन्धानको क्रममा उनको मृत्युसँग मिल्दोजुल्दो डिजिटल र फोरेन्सिक प्रमाणहरूको पर्याप्त मात्रा बरामद भएको रिपोर्टमा जनाइएको छ । सुरुमा शव घरभित्रै रहेको र घरबाट बाहिर घिसारेर निकालिएको प्रमाण भेटिएको पनि अदालती कागजातमा उल्लेख गरिएको छ ।