झापाको भद्रपुर विमानस्थलमा बुद्ध एयरको एक जहाज रनवेबाट चिप्लिएको छ। काठमाडौंका लागि उडान भर्ने तयारीमा रहेको जहाज बिहीबार रनवेमा चिप्लिँदै घाँसे मैदानमा पुगेको हो।
त्रिभुवन अन्तर्राष्ट्रिय विमानस्थलका महाप्रबन्धक टेकनाथ सिटौलाका अनुसार भद्रपुर विमानस्थलबाट काठमाडौं उड्न लागेको बुद्ध एयरको जहाज टेकअफको क्रममा रनवेबाट चिप्लिएको हो। जहाज रनवे पार गर्दै नजिकैको घाँसे क्षेत्रमा पुगेको बताइएको छ।
नेपाल नागरिक उड्डयन प्राधिकरणका प्रवक्ता ज्ञानेन्द्र भुलका अनुसार विमानमा ५१ जना यात्रु सवार थिए ।
घटनापछि विमानमा सवार यात्रुहरूको सुरक्षित उद्धार कार्य भइरहेको छ। प्रारम्भिक जानकारीअनुसार हालसम्म मानवीय वा भौतिक क्षति भएको विवरण प्राप्त भएको छैन।
महाप्रबन्धक सिटौलाले भने, “अहिलेसम्म कुनै क्षतिको जानकारी आएको छैन। घटनाबारे थप विवरण संकलन भइरहेको छ।”
जहाज चिप्लिनुको कारण खुल्न बाँकी रहेको छ। घटनाबारे नागरिक उड्डयन प्राधिकरण र सम्बन्धित निकायले अनुसन्धान सुरु गर्ने जनाएका छन्। मौसम, रनवे अवस्था वा प्राविधिक कारणमध्ये कुन तत्व जिम्मेवार हो भन्ने विषयमा अध्ययन भइरहेको बताइएको छ।
घटनाका कारण भद्रपुर विमानस्थलको उडान तालिका प्रभावित हुन सक्ने अनुमान गरिएको छ। यात्रुहरूलाई वैकल्पिक व्यवस्था मिलाउने तयारी भइरहेको सम्बन्धित निकायले जनाएको छ।
