नयाँदिल्ली- रूसी राष्ट्रपति भ्लादिमिर पुटिन बिहीबार भारत पुगेपछि द्विपक्षीय संवाद र भेटघाट जारी छ। भारतीय प्रधानमन्त्री नरेन्द्र मोदीले उनलाई विमानस्थलमै विशेष स्वागत गरे । स्वागतपछि पुटिनलाई मोदीले रूसी भाषामा अनुदित गीता उपहारस्वरूप दिएका छन् ।
पुटिन २३औँ भारत–रूस शिखर सम्मेलनका लागि दुई दिने भारत भ्रमणमा आएका हुन्। यसअघि उनी सन् २०२१ मा भारत आएका थिए। उनलाई स्वागत गर्न मोदी प्रोटोकल तोडेर आफैं पालम एयरपोर्ट पुगेका थिए।
मोदीले एयरपोर्टमा पुटिनलाई अँगालो मारेर स्वागत गरेका थिए। त्यसपछि दुवैजना एउटै कारमा बसेर प्रधानमन्त्री निवास पुगे, जहाँ पुटिनको सम्मानमा निजी डिनर आयोजना गरिएको थियो।
मोदीले पुटिनलाई रूसी भाषामा लेखिएको भगवद्गीताको प्रति उपहार दिए। उनले एक्समा लेखे, ‘मित्र पुटिनलाई स्वागत गर्न पाउँदा खुशी लागेको छ।’
शुक्रबार बिहान ११ बजे पुटिनको औपचारिक स्वागत राजकीय सम्मानसहित गरिएको छ। स्वागतपछि पुटिन राजघाटमा पुष्पाञ्जलि अर्पण गर्न पुगे । त्यसपछि दुवै नेता शिखर सम्मेलनका लागि हैदराबाद हाउस पुगेका छन् ।
