भारतको महाराष्ट्र राज्यको नान्देडमा एक अत्यन्तै दर्दनाक र विवादास्पद घटना सार्वजनिक भएको छ। फरक जातका प्रेमीको हत्या भएपछि २० वर्षीया युवती आँचलले प्रेमी सक्षम टेटेको शवसँग विवाह गरेकी छन्।
नान्देडको इतवारा क्षेत्रका २२ वर्षीय सक्षम टेटे र आँचल तीन वर्षदेखि प्रेम सम्बन्धमा थिए। उनीहरू विवाह गर्न चाहन्थे तर फरक जात भएकै कारण आँचलको परिवार लगातार विरोध गर्दै आएको भारतीय सञ्चारमाध्यमले उल्लेख गरेका छन्।
आँचलले विवाह गर्ने तयारी गरिरहेको जानकारी पाएपछि उनका दाजुभाइ र बुबाले सक्षमलाई “बोलाउने बहाना” बनाएर भेट्न बोलाए। भेट्न पुगेका सक्षमलाई:
पहिला कुटपिट
त्यसपछि टाउकोमा गोली
अनि ढुंगाले किचेर हत्या गरिएको बताइन्छ।
सक्षमको अन्तिम संस्कारका तयारी भइरहेको बेला आँचल अचानक उनका घर पुगिन्।
उनले:
सक्षमको शरीरमा हल्दी लगाइन्
सक्षमको हात समाएर आफ्नै निधारमा सिन्दूर लगाइन्
र घोषणा गरिन्– “उनको मृत्युमा पनि हाम्रो प्रेमले जित्यो।”
आँचलले अब आफू सक्षमकै घरमा बस्ने र उनलाई नै श्रीमान् मानिरहने घोषणा गरेकी छन्।
आँचलले आफ्नै बुबा र दाजुभाइलाई कठोर सजाय दिन माग गर्दै भनिन्—
“उनको मृत्युसँगै पनि हाम्रो प्रेम मरेन।”
यो घटनामा संलग्न आरोपमा प्रहरीबाट ६ जना पक्राउ परेका छन्।
पक्राउ परेकामध्ये:
गजानन बालाजिराव मामिलवाड
साहिल मामिलवाड
हिमेश मामिलवाड
जयश्री मदनसिंह ठाकुर
सोमेश लाखे
वेदान्त कुन्डेकर
प्रहरीले घटनाबारे थप अनुसन्धान गरिरहेको जनाएको छ।
