नेपाल वायुसेवा निगम (नेवानि) ले दोहाबाट काठमाडौं आउँदै गरेको उडानमा १ सय ग्राम सुन बोकेको पुष्टि भएपछि स्टेवार्ड सन्देश तिवारीलाई निलम्बन गरेको छ।
२७ नोभेम्बरमा संचालित ‘आरए–२४०’ दोहा–काठमाडौं उडानमा तिवारीले व्यक्तिगत रूपमा साढे ८ तोला बराबरको सुन ल्याउन खोजेको पत्ता लागेपछि उनी तत्काल छानबिनमा परेका थिए।
छानबिन नसकिँदासम्म वा बढीमा तीन महिनासम्म निलम्बन गर्न सकिने कानुनी व्यवस्था अनुसार उनलाई जिम्मेवारीबाट हटाइएको नेपाल वायुसेवाले जनाएको छ।
दोहा विमानस्थलमा भएका सोधपुछ तथा खानतलासीका क्रममा तिवारीले साथमा राखेको १ सय ग्राम सुन बरामद भएको दोहा भन्सारले पुष्टि गरेको निगमले जनाएको छ।
घटनापछि दोहा स्टेसन म्यानेजरको रोहवरमा समस्या समाधानको प्रकृया अघि बढाइँदा उडान करिब ३०–३५ मिनेट ढिलो प्रस्थान गरेको पनि पाइएको छ।
नेवानिले घटनाबारे थप छानबिन जारी राखेको र प्रतिवेदन आएपछि आवश्यक अनुशासनात्मक कारबाही अघि बढाइने जनाएको छ।
