मेची राजमार्गअन्तर्गत इलाम नगरपालिका–९ भञ्ज्याङमा आज दिउँसो ट्रक र स्कुटर एकआपसमा ठोक्किँदा दुई जनाको मृत्यु भएको छ। झापाबाट इलामतर्फ आइरहेको प्रदेश १–०१–००१ ख ४१०१ नम्बरको ट्रक र विपरीत दिशातर्फ जाँदै गरेको प्रदेश १–०१–०१२ प ४८९९ नम्बरको स्कुटर आपसमा ठोक्किएपछि दुर्घटना भएको हो।
जिल्ला प्रहरी कार्यालय इलामका अनुसार मृतकमध्ये इलाम नगरपालिका–९ गोलबस्तीका २६ वर्षीय डेबिट थापा मगर,माईजोगमाई गाउँपालिका नयाँबजार घर भई हाल इलाम–७ चोकबजार बस्दै आएका १९ वर्षीय छेवाङ शेर्पा रहेका छन्।
दुर्घटनालगत्तै दुवै जनालाई उपचारका लागि जिल्ला अस्पताल पुर्याइए पनि चिकित्सकले मृत घोषित गरेका थिए, प्रहरी नायब उपरीक्षक तथा सूचना अधिकारी लक्ष्मी भण्डारीले जानकारी दिए।
घटनामा संलग्न ट्रक चालक इलाम–५ बिब्ल्याटेका २५ वर्षीय रामप्रसाद श्रेष्ठलाई प्रहरीले नियन्त्रणमा लिएर आवश्यक अनुसन्धान अघि बढाएको छ।
