बुटवल — उच्च अदालत तुलसीपुरको बुटवल इजलासले सहकारी ठगी प्रकरणमा नख्खु कारागारमा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र उनका साझेदार, पूर्व डीआईजी छविराज जोशीको मुद्दासम्बन्धी सम्पूर्ण फाइल झिकाउन आदेश दिएको छ।

न्यायाधीशद्वय वासुदेव आचार्य र ओमप्रकाश अर्यालको संयुक्त इजलासले जिल्ला अदालत रुपन्देहीले जारी गरेको आदेशसहित मुद्दाको मिसिल (फाइल) झिकाउने निर्णय गरेको हो।

रविले यसअघि बिगो बराबरको रकम जम्मा गरेर थुनामुक्त हुन पाउन माग गर्दै निवेदन दिएका थिए। त्यही निवेदनमाथि सुनुवाइ भइरहेकै क्रममा उच्च अदालतले जिल्ला अदालतको मिसिल अपुग भएको भन्दै सबै फाइल झिकाउन आदेश जारी गरेको हो।

यसअघि, मुद्दा हेर्दा छविराज जोशीका तर्फबाट अधिवक्ता अपूर्व खतिवडाले बहस गर्दा न्यायाधीशहरूले आवश्यक मिसिल पूरा नभएको बताउँदै अतिरिक्त कागजात झिकाउन निर्देशन दिएका थिए।

सोही दिन, रविका तर्फबाट बहस सुरु हुन नपाई कात्तिक १३ गतेको पेसी स्थगित भएको थियो। त्यसपछि बिहीबार पुनः सुनुवाइ भएर नयाँ आदेश आएको हो।

यसअघि, न्यायाधीशद्वय मिलनकुमार राई र ओमप्रसाद अर्यालको इजलासले रवि लामिछाने र छविराज जोशीको मुद्दा प्रकृतिमा समान भएकाले दुवै मुद्दा एउटै इजलासमा एकैसाथ राखेर हेर्न आदेश दिएको थियो।