दाङ — काँग्रेस नेता कान्छाराम तामाङसम्बद्ध निर्माण कम्पनीले लामो समयसम्म काम अघि नबढाएपछि हुलाकी सडक आयोजनाले ठेक्का सम्झौता रद्द गर्ने अन्तिम तयारी सुरू गरेको छ।

छ वर्षदेखि अलपत्र रहेको गढवा–कालाकाँटे हुलाकी सडक अपेक्षित प्रगतिमा पुग्न नसकेपछि नेपालगन्जस्थित आयोजनाले ठेक्का तोड्ने प्रक्रिया सक्रिय रूपमा अघि बढाएको हो।

दाङ सडकखण्डअन्तर्गत गढवा–वनघुस्रीसम्मको करिब २० किलोमिटर सडक निर्माण गर्न २०७६ कात्तिक २९ गते हुलाकी सडक आयोजनाले बज्रगुरु काञ्छाराम जेभी काठमाडौंसँग ६५ करोड रुपैयाँमा ठेक्का सम्झौता गरेको थियो।
तीन वर्षभित्र निर्माण सक्ने शर्त भए पनि कम्पनीको निरन्तर लापरबाहीका कारण काम ढिलोचाँडो अघि बढेको आयोजनाको दाबी छ।

सम्झौताअनुसार काम नबढेपछि २०७९ मंसिरमा पहिलो पटक म्याद थपेर २०८० साउन १० सम्म समय दिइयो। त्यसपछि पनि पटक–पटक म्याद थपिए पनि निर्माण कम्पनीले काम गर्न सकेन, हुलाकी सडक आयोजनाका प्रमुख लिलाबहादुर भण्डारीले जानकारी दिए।

हालसम्म ९ किलोमिटरमा एक तह कालोपत्रे गरिएको छ भने बाँकी भागमा ग्राभेल मात्र छ।

गत वर्ष ठेक्का तोड्ने प्रक्रिया सुरू गरिएको भए पनि कानुनी प्रकृया अनुसार कम्पनीलाई २०० दिनको अतिरिक्त समय दिइएको थियो।
त्यसमध्ये अहिले १२२ दिन बितिसक्दा ७८ दिन मात्र बाँकी छ। तर, कम्पनीले उल्लेखनीय प्रगति देखाएको छैन।

आयोजना प्रमुख भण्डारी भन्छन्—

“अब बाँकी ७८ दिनमा काम सकिने कुनै सम्भावना छैन। कम्पनी अहिले काममै सक्रिय छैन।”

उनीका अनुसार, दसैँतिर कम्पनीले काम गरिरहेको देखिए पनि अहिले प्रतिनिधिहरूसँग सम्पर्क नै हुन सकेको छैन।

आयोजनाले कानुनी प्रक्रिया अनुसार कम्पनीलाई दिएको अन्तिम अवसर पनि काम नहुने देखिएपछि अब ठेक्का रद्द गर्ने वा पूर्वनिर्धारित क्षतिपूर्ति तिराएर काम गराउनेबारे अन्तिम निर्णय गर्न कम्पनीका प्रतिनिधिसँग छलफल गर्दैछ।

यदि कम्पनीले क्षतिपूर्ति तिरेर काम गर्न चाहेमा, ६५ करोडको १०% = ६ करोड ५० लाख रुपैयाँ बुझाउनुपर्ने आयोजनाले जनाएको छ।

आयोजनाका अनुसार हाल निर्माणको भौतिक प्रगति ४०% र वित्तीय प्रगति ३५% मात्र छ।

निर्माण कम्पनीले अहिलेसम्म गरेको कामको करिब २ करोड रुपैयाँ जति भुगतान बाँकी छ।
बज्रगुरु काञ्छाराम जेभीका सञ्चालक कान्छाराम तामाङ—रमेछाप काँग्रेसका सभापति तथा पूर्व ऊर्जा राज्यमन्त्री—को नेतृत्वमा रहेको कम्पनीले ठेक्का कार्य पूरा गर्न बारम्बार असफल हुँदै आएको आयोजनाले जनाएको छ।