नवलपरासी (बर्दघाट सुस्ता पूर्व) ।नेपाली कांग्रेसका मध्यबिन्दु नगर सभापति दोमन भण्डारीले शुक्रबार एक कार्यक्रममा औपचारिक रूपमा राष्ट्रिय स्वतन्त्र पार्टी (रास्वपा) प्रवेश गरेका छन् ।

भण्डारी २०७१ सालयता दुईपटक कांग्रेस सभापति निर्वाचित भइसकेका नेता हुन् । झन् रोचक कुरा के भने उनले आफ्नै घरमा ५ वर्षअघि कांग्रेसको नगर पार्टी कार्यालय स्थापना गरेका थिए । तर, अहिले त्यहीँ कार्यालयमै कांग्रेसलाई बिदा गर्दै रास्वपाको झण्डा गाडेका छन् ।

कार्यक्रममा सहभागी हुँदै रास्वपाका गण्डकी प्रदेश सभापति राजन गौतमले भण्डारीलाई पार्टी प्रवेश गराएका थिए । गौतमका अनुसार भण्डारीलाई पार्टीले केन्द्रीय प्रचार विभाग सदस्यको जिम्मेवारी पनि दिएको छ ।

लामो समयदेखि कांग्रेसको राजनीतिमा सक्रिय रहेका भण्डारीले अब भने कांग्रेसप्रति असन्तुष्टि जनाउँदै पार्टी छाडेको बताएका छन् ।
उनले भने,

‘५ वर्षदेखि मेरै घरमा कार्यालय छ । तर, पार्टी भने अब मेरो घर रहेन । हिजोसम्म नगर सभापति थिएँ, आजदेखि रास्वपामा छु । कांग्रेसले जनताको सुख-दुःख बिर्सियो, पार्टीमा गुटबन्दीले राम्रो मान्छे भन्दा नेताका आफ्ना मान्छे मात्र अगाडि बढ्छन् ।’

भण्डारी नेपाली सेनाको जागिर छाडेर करिब १० वर्ष अफगानिस्तानमा बसेर फर्किएका थिए । उनी चितवन राष्ट्रिय निकुञ्ज मध्यवर्ती क्षेत्र व्यवस्थापन समिति (काउन्सिल) का सदस्य हुन् । साथै, नारायणी सह लगानी खानेपानी तथा सरसफाई उपभोक्ता संस्थाका संस्थापक अध्यक्ष र राइनो क्लबका पूर्व नेतृत्वसमेत रहिसकेका छन् ।