ललितपुर ।सामान्यत: मानिसले प्रधानमन्त्री वा गृहमन्त्रीसँग फोटो खिचेर फेसबुकमा हाल्दा इज्जत बढ्छ भन्ने सोच्छन्। तर, सिन्धुपाल्चोक इन्द्रावती–५ घर भई हाल सुकेधारा बस्ने कविराज कटुवालको हकमा भने उल्टै भयो। भीआईपीहरूसँग फोटो खिचेर सामाजिक सञ्जालमा “कनेक्शन छ” भन्ने सन्देश दिएका उनी अहिले ललितपुर प्रहरीको हिरासतमा छन्।

३४ वर्षीय कटुवालमाथि थोरै लगानी गरेर धेरै रकम असुल्ने ‘मिटरब्याज धन्दा’ चलाएको आरोप छ। भदौ ३ गते साँझ उनलाई मकवानपुरको हेटौंडाबाट पक्राउ गरिएको हो।

करिब चार वर्षअघि बौद्धमा रेडिमेड कपडा र जुत्ताको व्यापार गर्ने एक युवकसँग कटुवालको चिनजान भयो। फेसबुकमा “भीआईपीहरूसँग नजिक छु” भन्ने किसिमका फोटो देखेर प्रभावित ती व्यापारीले उनलाई व्यवसाय विस्तारका लागि सहयोग मागे। त्यसैपछि सुरु भयो ऋण–सापटीको खेल।

कटुवालले २०८० वैशाखमा ती व्यापारीलाई पटक–पटक गरेर १ करोड ४० लाख रुपैयाँ ऋण दिए। ब्याज तिनुपर्ने सर्त थियो। तर, ऋण तिरेर राहत पाउने सट्टा ती व्यापारी अझै सडकमा आइपुगे।

व्यापारीको दाबी अनुसार उनले अहिलेसम्म ४ करोड ८६ लाख ९३ हजार रुपैयाँ कटुवाललाई बुझाइसकेका छन्। तर पनि ऋण सकिएको छैन। बरु, कटुवालले थप धम्की दिँदै साउन २२ गते व्यापारीको बा २० च ५२० नम्बरको क्रेटा गाडी कब्जा गरे। यसैगरी उनले ५ लाख ५० हजारको चेक समेत लिएका थिए।

अनुसन्धानमा खुलेको छ—कटुवालले रकम असुल्न कम्तीमा ८ जनाको बैंक खाता प्रयोग गरेका छन्।

आफ्नै एभरेष्ट बैंक खातामा १ करोड १३ लाख ६० हजार

कुमारी बैंकमा ५८ लाख

पशुपति कटुवाल क्षत्रीको खातामा १८ लाख ३० हजार

मञ्जु भण्डारीको खातामा १४ लाख २५ हजार

भीमराज गिरीको खातामा ७२ लाख ८० हजार

शिवमाया गिरीको खातामा ५ लाख ५० हजार

शरद प्रताप सिंहको खातामा ३ लाख २० हजार

सलिना कटुवालको खातामा करिब २८ लाख

विक्रम सिंह गुरुङको खातामा १५ लाख

तिलकराम राईको खातामा ८ लाख ६० हजार

यी सबै रकम मोबाइल बैंकिङ, आईपीएस र आरटीजीएस प्रणालीमार्फत जम्मा भएको पीडितको दाबी छ।

तर, आरोपी कटुवाल भने निर्दोष भएको दाबी गर्छन्। उनले अनुसन्धान अधिकृतलाई भनेका छन्, “मेरो खातामा वा मैले भनेका मानिसहरूको खातामा पैसा जम्मा भएको मलाई थाहा भएन।”