विराटनगर ।नेपाली राष्ट्रिय क्रिकेट टोलीका खेलाडी ललित राजवंशीले जनता आवास कार्यक्रम अन्तर्गत बनाइने भनिएको घर नलिने घोषणा गरेका छन्। उनले उक्त सुविधा विपन्न परिवारलाई दिन सरकारसँग आग्रह गरेका छन्।

प्रदेशसभा सदस्य अमृत अर्यालले केही दिनअघि राजवंशीकी आमा शुभकुमारी राजवंशीको निधनपछि श्रद्धाञ्जली दिन जाँदै, जनता आवास कार्यक्रममार्फत राजवंशीलाई घर बनाइदिने घोषणा गरेका थिए। तर, राजवंशीले उक्त घोषणा अस्वीकार गर्दै आफू घर बनाउन सक्षम भएको स्पष्ट पारेका हुन्।

सञ्चारकर्मीहरूसँग कुरा गर्दै राजवंशीले भने, “म यसैपालि घर बनाउने योजनामा थिएँ, आमाको निधनका कारण बनाउन सकिन। अहिले मेरो परिवार राख्ने घर बनाउन सक्ने अवस्था छ। जनता आवास कार्यक्रम विपन्नका लागि हो, जसलाई आवश्यकता छ उसलाई दिनुपर्छ।”

उनले थपे, “सरकारले सहानुभूति गरेर केही दिन्छ भने ठिक छ। तर, मेरो नाममा भनेर विपन्नका लागि आएको बजेट म लिन्न। जसलाई साँच्चिकै चाहिन्छ, त्यसलाई दिनुहोस्।”

राजवंशीको परिवार विराटनगरमै बस्दै आएको छ। उनका नाममा विराटनगर महानगरपालिका भित्रै करिब एक विगाह जग्गा रहेको छ।

प्रदेशसभा सदस्य अर्याल मोरङ क्षेत्र नम्बर ५ (२) बाट नेपाली कांग्रेसका तर्फबाट निर्वाचित सांसद हुन्। उनी ललितको निर्वाचन क्षेत्रकै प्रतिनिधि समेत हुन्।

राजवंशीको यो निर्णयले फेरि एकपटक नेपाली जनताको मन जितेको छ। क्रिकेट मैदानमा उत्कृष्ट प्रदर्शन गर्ने उनी सामाजिक जिम्मेवारीमा पनि उस्तै अनुकरणीय देखिएका छन्।