काठमाडौं । एमाले बागमती प्रदेश कमिटी सदस्य र सहकारी क्षेत्रकी प्रभावशाली नेता सीता ढकाल पौडेलको नाम युनाइटेड गोरखा बचत तथा ऋण सहकारीमा ठूलो अपचलनमा मुछिएको छ । सहकारीका करिब ७ सय सदस्यका करिब १३ करोड रुपैयाँ अपचलन भएको पाइएको हो।

स्रोतका अनुसार, पौडेलले सहकारीको रकम जलेश्वर स्वच्छन्द बिकोइ बिल्डर्सलाई भवन निर्माणका लागि उपलब्ध गराएकी थिइन्। तर, बिल्डर्स कम्पनीले रकम भुक्तानी नगरेपछि सहकारीको बचतकर्ताका लगानी जोखिममा परेको छ।

पौडेलले यसअघि सहकारी र गरिबी निवारण क्षेत्रमा आफ्नो प्रभाव कायम गर्दै, नेफ्स्कुन (सहकारीहरूको केन्द्रीय संघ)की सञ्चालक समेत रहेकी छिन्। उनी युनाइटेड गोरखा सहकारीको प्रतिनिधित्व गर्दै केन्द्रीय तहमा पनि पहुँच राख्छिन्।

स्रोतका अनुसार, पौडेल र बिल्डर्सका अध्यक्ष मनोजकुमार भेटवालबीच रकम भुक्तानीको लिखित सहमति भएको थियो। भेटवालले २६ साउन २०८० मा ४ करोड र ३० मंसिर २०८० मा ८ करोड ८१ लाखको चेक बुझाउने लिखत गरेका थिए। तर, यी चेक भुक्तानी नभएकाले सहकारी संकटमा परेको छ।

पौडेलले “सहकारीले रकम ऋण दिएको होइन, संस्थाको ऋणीले बिल्डर्सलाई लगेको हो। रकम तिर्न नसक्ने अवस्था भएको छ,” भनी स्वीकार गरेकी छिन्। उनले जलेश्वरले विगतमा केही रकम तिरेको भए पनि पछिल्लो समयमा भुक्तानी नभएको बताइन्।

स्रोतका अनुसार, सहकारीको कुल बचत करिब १० करोड र सेयर पूँजी करिब २ करोड छ। तर, राजनीतिक प्रभावका कारण धेरै समयसम्म यो विषय बाहिर आउन रोकिएको थियो।

विशेषज्ञहरूका अनुसार, यस किसिमको हिनामिना र अपचलनले सहकारी क्षेत्रमाथि जनविश्वास कमजोर पार्ने खतरासँगै, राजनीतिक संरक्षणमा भएको व्यवहारको सवाल उठाएको छ।