काठमाडौं । लोकप्रिय टेलिभिजन शो कमेडी दरबार मा अभिनय गर्ने कमेडियन तथा लेखक विकास अर्याल पछिल्लो प्रस्तुति सार्वजनिक भएलगत्तै धम्कीको शिकार भएका छन्।

अर्यालले हालै रिलिज भएको माग्ने राजा चलचित्रसँग जोडिएको एपिसोड मा पूर्वप्रधानमन्त्री पुष्पकमल दाहाल प्रचण्डको नक्कल गर्दै प्रस्तुति दिएका थिए। सोही नक्कलमा बोलेका केही संवादलाई लिएर बारम्बार धम्कीपूर्ण फोन आउने गरेको उनले बताए।

अर्यालका अनुसार, अपरिचित नम्बरबाट फोन आउने तर परिचय नखुलाउने व्यक्तिहरूले “भिडियोबाट केही संवाद हटाउनुपर्छ” भन्ने दबाब दिइरहेका छन्।

“मैले उहाँहरूलाई प्रष्टै भनेको छु – यो एउटा कमेडी शो हो। हाँसाउने उद्देश्यले मात्रै संवाद बोलेका हौं। त्यसलाई व्यङ्ग्यकै रूपमा लिनुपर्छ,” – कमेडियन अर्याल।

कार्यक्रमको करिब ४३ औँ मिनेटमा प्रचण्डको शैलीमा बोलेको “म युद्ध मात्र लडेको होइन, चुनाव मात्र लडेको होइन, अस्ति ट्वाइलेटमा पनि लडेको मान्छे हो” भन्ने संवादलाई आपत्ति जनाइएको छ।

त्यस्तै ४४ औँ मिनेटमा अभिनेत्री वर्षा सिवाकोटीलाई माओवादीसँग तुलना गर्दै बोलेको “यस्तो लुक्समा हिँडेपछि १७ हजार कसो नढाल्लिन् र” भन्ने भनाइप्रति समेत असहमति आएको उनले बताए।

यसबाहेक, भिडियोमा समावेश गरिएको “५ हजारको जिम्मा” भन्ने प्रसङ्गमा समेत फोनमार्फत आपत्ति जनाइएको छ।

अर्यालले सामाजिक सञ्जालमार्फत पनि प्रतिक्रिया दिँदै भनेका छन् –“कृपया हास्य–व्यङ्ग्यलाई हास्य–व्यङ्ग्यकै रूपमा लिनुहोस्। हाम्रो उद्देश्य केही क्षणका लागि भए पनि दर्शकलाई हँसाउनु हो, विवाद ल्याउनु होइन।”