धरान – दुई दिनदेखि हराइरहेकी धरान–१६ की १९ वर्षीया अनिता राई आइतबार मृत फेला परेकी छन्। सप्तकोशीमा बगेकी उनको शव सुनसरीको बराहक्षेत्र–९, राजाबास नजिकै कोसी किनारमा देखिएको हो।

इलाका प्रहरी कार्यालय महेन्द्रनगरका प्रमुख निरीक्षक दिवस कुँवरका अनुसार स्थानीयले देखेको शवलाई प्रहरीले उद्धार गरी बीपी कोइराला स्वास्थ्य विज्ञान प्रतिष्ठान, धरानमा पोस्टमार्टमका लागि पठाइएको छ।

शुक्रबार दिउँसो अनिता आफ्ना बुवा जीवन राईसँग मोटरसाइकलमा बराहक्षेत्र मन्दिर दर्शन गर्न गएकी थिइन्। फर्कँदै गर्दा दुधपानी खोला तर्ने क्रममा अकस्मात आएको भेलले उनीहरूलाई बगायो।

जीवन राईलाई स्थानीयले तत्कालै जीवितै उद्धार गरे।

तर अनिता भने खोलासँगै बगेर सप्तकोसीमा हराइन्।

शुक्रबारदेखि प्रहरी, स्थानीय र उद्धार टोलीले लगातार खोजी गरे पनि अनिता फेला परेकी थिइनन्। आइतबार दिउँसो राजाबासतर्फ कोसीको भङ्गालोमा तैरिरहेको अवस्थामा उनको शव देखिएको हो।

उद्धारपछि अस्पताल लगिएका जीवन राई उपचाररत छन् भने छोरी गुमाएकाले परिवार शोकमग्न बनेको छ। स्थानीयवासीले यो घटनाले बराहक्षेत्र क्षेत्रमा गहिरो पीडा र त्रास थपेको बताएका छन्।