काठमाडौं । प्रधानमन्त्री केपी शर्मा ओलीले पदभार सम्हालेको १४ महिनापछि भारत भ्रमणको निम्तो पाएका छन्। भारतीय प्रधानमन्त्री नरेन्द्र मोदीको निमन्त्रणामा ओली भदौ ३१ देखि दुई दिने औपचारिक भ्रमणमा बोधगया जाने तयारीमा छन्।

ओलीसहितको प्रतिनिधिमण्डल नेपाली सेनाको विमानमार्फत काठमाडौंबाट बोधगया प्रस्थान गर्नेछन्। आवश्यक अनुमति लिन भारतसँग प्रक्रिया सुरु भइसकेको छ।

भ्रमणका क्रममा ओली र मोदीबीच विशेष भेटवार्ता हुने कार्यक्रम तय भएको छ। यो भेटवार्ता दुई मुलुकबीचको राजनीतिक र आर्थिक सम्बन्ध मजबुत बनाउनको लागि महत्वपूर्ण हुने बुझिएको छ।

प्रधानमन्त्री बनेको लामो समय बितिसक्दा पनि भारततर्फबाट औपचारिक निम्तो नआएपछि यो भ्रमणलाई विशेष महत्व दिइएको छ। यसले नेपाल–भारत सम्बन्धमा नयाँ गतिशीलता ल्याउने अपेक्षा गरिएको छ।

भ्रमणको कार्यतालिका र तयारीबारे छलफल गर्न भारतीय विदेश सचिव बिक्रम मिश्री आइतबार काठमाडौं आएका छन्। उनले मोदीको तर्फबाट औपचारिक निमन्त्रणापत्र ओलीलाई हस्तान्तरण गरेका छन्।