काठमाडौँ । अधिवक्ता स्वागत नेपालले राष्ट्रिय स्वतन्त्र पार्टी (रास्वपा) का सभापति रवि लामिछानेको जेल सरुवालाई रुपन्देही–३ मा हुन गइरहेको प्रतिनिधिसभा उपनिर्वाचनको प्रभावको रूपमा व्याख्या गरेका छन् ।

लामिछाने सहकारी ठगी र सङ्गठित अपराध मुद्दाको पुर्पक्षका लागि रुपन्देही कारागारमा थुनामा रहेका थिए । उनलाई सरुवा गरेर अहिले नख्खु कारागार ल्याइएको छ । रविले गत जेठमै नख्खु कारागारमा सरुवाका लागि निवेदन दिएका थिए । अदालतले अनुमति दिए पनि गृह प्रशासनले प्रक्रिया रोकेको थियो ।

लामिछानेलाई कुनै दया मायाले जेल सारिएको नभई उनलाई त्यहाँ राखिराखे रास्वपाको भोट बढ्ने खतरालाई मध्यनजर गरेर यस्तो नीति अपनाइरहेको अधिवक्ता स्वागत नेपालको दाबी छ ।

शनिबार आयोजित साक्षात्कार कार्यक्रमलाई सम्बोधन गर्दै उनले भने, ‘रुपन्देहीमा उहाँलाई त्यही जेलमा राखिरहँदा भेट्न जाने, आउने चहलपहल बढ्छ र रास्वपाको माहोल बढ्छ भनेर त्यहाँबाट हटाइहाल्नुपरेको छ सरकारलाई । काठमाडौँतिर ल्याउनुपरेको छ । कारण यति मात्रै हो । सिँगान पुछिदिएजस्तो गरेर नाक काटिदिएजस्तो मात्रै हो । उहाँ त्यहाँ रहिरहनुभयो भने रास्वपाको चुनावको माहोल बढ्नेछ भनेर मात्रै त्यहाँबाट हटाउन खोजिएको हो । कुनै दया मायाले होइन ।’

उनले भ्रष्टाचारीलाई मृत्युदण्ड दिनुपर्ने कानुन बनाइनुपर्ने पनि बताएका छन् । भ्रष्टाचार अन्त्यको अन्तिम विकल्प भनेको मृत्युदण्ड नै रहेको उनको भनाइ छ । उनले पूर्वीय दर्शनले मृत्युदण्डलाई स्वीकार गर्ने बताए । तत्कालीन समयमा मनुस्मृतिले बलात्कारीको लिङ्ग काट्नुपर्ने व्यवस्था गरेको स्मरण गराउँदै उनले भ्रष्टाचारको अन्त्यका लागि एउटा मात्रै विकल्प मृत्युदण्ड रहेको दाबी गरेका हुन् ।