राष्ट्रिय स्वतन्त्र पार्टीका सभापति रवि लामिछानेलाई रुपन्देहीको भैरहवा कारागारबाट ललितपुरको नक्खु कारागारमा सरुवा गर्ने निर्णय भएको छ।

कारागार व्यवस्थापन विभागका महानिर्देशक लीलाप्रसाद शर्माले शुक्रबार लामिछानेलाई सरुवा गर्ने निर्णय गरेका हुन्। लामिछानेले पहिले नै अदालत र जिल्ला प्रशासन कार्यालयबाट कारागार सरुवाको अनुमति पाइसकेका थिए।

सरुवा प्रक्रिया लामो समय रोकिएको थियो। यसबारे आलोचना पनि भइरहेको थियो, विशेषगरी गृहमन्त्री रमेश लेखकको निर्देशनमा विभागले सरुवा रोकेको विषयमा गत हप्ता, राष्ट्रिय मानवअधिकार आयोगले कारागार निरीक्षण गर्दै, सबै प्रक्रिया पूरा भइसके पनि उनलाई सरुवा नगरिएकोमा ध्यानाकर्षण गराएको थियो।

महानिर्देशक शर्माका अनुसार, “अब रुपन्देही कारागारले आवश्यक प्रक्रिया पूरा गरेर उहाँलाई नक्खु कारागारमा सरुवा गर्नेछ। यो एउटा नियमित प्रक्रिया हो र उहाँले पनि सरुवा माग गरेका थिए।” पुर्पक्षका लागि कारागारमा रहेका उनले कारागार सरुवा हुन पटक पटक प्रयास गरे पनि कारागार प्रशासनले स्वीकृत गरेको थिएन।

उनले डिल्लीबजार कारागारमा आउने प्रयास गरेका थिए। तर कारागार प्रशासनले नक्खुमा रहेको कारागारमा ल्याउने निर्णय गरेको हो।