मितेरी सहकारी ठगी प्रकरणमा शंकाको घेरामा रहेका नेपाली कांग्रेसका उपसभापति तथा संघीय सांसद धनराज गुरुङलाई सिआइबीको अनुसन्धान प्रतिवेदनले उन्मुक्ति दिएको छ। तर, उनकी पूर्वपत्नी ज्योति गुरुङलाई भने प्रतिवादी बनाउँदै ३० करोड रुपैयाँ बिगो दाबी गरिएको छ।

ज्योति हाल अमेरिकामा छिन् र उनलाई सहकारीको १२ करोड ९४ लाख ८९ हजार ३५७ रुपैयाँ अपचलनको अभियोग लागेको छ। ब्याज जोड्दा सहकारीले लिनुपर्ने रकम १४ करोड ८१ लाख रुपैयाँ हुने सहकारीको दाबी छ।

धनराज र ज्योतिबीच २०७६ फागुन २९ मा सम्बन्धविच्छेद भए पनि सहकारीले यो “कागजी” भएको बताउँदै दुवैको संलग्नता देखाएको छ। सहकारीको दाबी अनुसार—धनराजले २०७७ फागुन ३ मा सहकारीबाट १२ लाख ऋण लिँदा ज्योतिको नामलाई हकवाला भनी उल्लेख गरेका थिए।

२०७९ मंसिर ४ को चुनावमा उम्मेदवारी दर्ता गर्दा पनि धनराजले “श्रीमती” भनी ज्योतिकै नाम उल्लेख गरेका थिए।

यही आधारमा उच्चस्तरीय छानबिन समितिले धनराजविरुद्ध पनि छानबिन गर्न सिफारिस गरेको छ। तर, सिआइबीले भने अहिलेसम्म धनराजको संलग्नता नदेखिएको भन्दै प्रतिवादी नबनाउने निर्णय गरेको छ।