सिरहाको कल्याणपुर नगरपालिकाका नगरप्रमुख रामपुकार साह अख्तियारको नियन्त्रणमा पुगेको केही दिनमै १ लाख रुपैयाँ धरौटीमा रिहा भएका छन्।

अख्तियार दुरुपयोग अनुसन्धान आयोगले नाला निर्माण कार्यको भुक्तानीका लागि सेवाग्राहीसँग १ लाख घुस लिएको ठहर गर्दै विशेष अदालतमा मुद्दा दायर गरेको थियो। अध्यक्ष न्यायाधीश टेकनारायण कुँवरसहितको संयुक्त इजलासले बयानपछि धरौटीमा छोड्ने आदेश दिएको हो।

अख्तियारका अनुसार, साहले वडा नं. ६ मा सम्पन्न नाला निर्माण कार्यको भुक्तानी प्रक्रिया अघि बढाउने क्रममा बिचौलियामार्फत रकम लिएका थिए। बर्दिवासस्थित अख्तियार टोलीले उनलाई एक लाख रुपैयाँसहित रंगेहात पक्राउ गरेको थियो।

विशेष अदालतमा दायर मुद्दामा भ्रष्टाचार निवारण ऐन २०५९ बमोजिम कैद सजाय र बिगोअनुसार जरिवाना माग गरिएको छ। साह एमालेबाट निर्वाचित भएका हुन्।