राजधानीमा बिहीबार आयोजित पार्टीनिकट उद्योगी व्यवसायीको भेलामा नेकपा (एकीकृत समाजवादी) का अध्यक्ष माधवकुमार नेपाल फेरि पनि पूर्वप्रधानमन्त्री तथा पार्टीका सम्मानित नेता झलनाथ खनालतर्फ लक्षित टिप्पणी गर्दै मञ्चमा उत्रिए।

पार्टीको निर्णय अनुशासन र प्रतिष्ठाका लागि भएको प्रष्ट्याउँदै नेपालले, खनालको “एमाले फुटाउनुको औचित्य छैन” भन्ने भनाइलाई सीधा जवाफ दिए—“मिडियामा जाने पार्टीको बदख्वाइँ गर्ने? विद्रोहको औचित्य छैन भन्ने? किन आउनुपर्‍यो विद्रोह ठीक लागेन भने? केपी ओलीजीको सेवा गरेर बसे भइहाल्थ्यो नि!”

नेपाल यतिमै रोकिएनन्। उनले आफूहरू एमालेबाट छुट्टिएको निर्णयलाई ऐतिहासिक आँटको परिणाम भन्दै थपे—

“हामीले ठिक गर्‍यौं, आँट गर्‍यौं। पहिलो गाँसमा ढुंगो हैन, सुनको सिक्का पायौं। संविधान मिच्ने, उल्लंघन गर्ने गलत परम्परा बसाल्ने काम भइरहेको थियो। यसको विरुद्ध विद्रोह गर्‍यौं, सडकमा आयौं, अदालत गयौं, मुद्दा लड्यौं— सबै लडाइँमा जित्यौं।”

नेपालको यो टिप्पणीले पार्टीभित्रको पुरानो मतभेदलाई फेरि चर्काउने संकेत दिएको राजनीतिक विश्लेषकहरूको ठम्याइ छ।