सपना बोकेका थिए—श्रीमतीको भविष्य बनाउने । त्यसैले लोकसेवा आयोगको परीक्षा दिन बुटवल पुगेकी श्रीमतीलाई साथ दिन गएका थिए पाल्पाको रामपुर नगरपालिका–६ पोखराका जनक भण्डारी । सँगैको यात्रामा शिद्धबाबा मन्दिर दर्शन पनि गरे, फर्कँदै थिए—तर जीवनको अन्तिम मोडमा ।
बुटवल–पाल्पा सडकखण्डको सिद्धबाबा क्षेत्रमा मंगलबार साँझ सवारीसाधनमाथि पहिरो खस्यो । सोही पहिरोमा परे जनक भण्डारी । उनी चढेको मोटरसाइकललाई माथिबाट आएको पहिरोले लछार्दै करिब ३५ मिटर तल तान्यो ।
लु ५१ प ६६३३ नम्बरको मोटरसाइकलमा सवार भण्डारी दम्पती सोही पहिरोमा परेका थिए । मोटरसाइकल र कल्पनालाई सडकमै अडिए पनि जनकलाई भने पहिरोसहित झरेको ढुंगाले उछिट्ट्याउँदै सडकदेखि ३५ मिटर तल तिनाउ खोलाको पहरोमा पुर्याएको थियो।
स्थानीय र सुरक्षाकर्मीले उद्धार गरे, तत्काल अस्पताल पुर्याए—तर बचाउन सकिएन । ३६ वर्षीय जनकको घटनास्थलमै मृत्यु भएको प्रहरीले पुष्टि गरेको छ ।
भण्डारी परिवारमा बुधबार वार्षिक पुण्य तिथिको काम हुँदै थियो । जनकका बाजे गत वर्ष निधन भएका विमल भण्डारीको वार्षिक पुण्य तिथिको लागि टाढा टाढाका आफन्त र पाहुनाहरू मंगलबार साँझ नै ताल पोखरा आइसकेका थिए ।
घरपरिवार र आफन्तहरू विमलको वार्षिकीमा गर्ने किरिया कर्महरूको तयारीमा जुटिरहेका थिए । तर बाजेको पुण्यतिथिमा रहेको भण्डारी परिवार जनकको निधनले थप शोकमा परेको छ ।
जनककी श्रीमती केही समयदेखि लोकसेवा तयारी गर्दै थिइन् । उनलाई साथ दिँदै बुटवल गएका जनकले सायद कल्पना गरेका थिएनन् कि उनी फर्कंदा चिता बन्नेछन् । ‘उहाँले श्रीमतीको करियरका लागि आफ्नै काम छाडेर सघाउने निर्णय गर्नुभएको थियो ।’ जनकका एक आफन्तले भावविह्वल हुँदै भने ।]
