जापानको टोकियोमा चर्चित बेसबल खेलाडी ओहतानी शोहेईको नाम र फोटो प्रयोग गरेर नक्कली फेसबुक आईडी खोली ८० वर्षीया वृद्धाबाट १० लाख येन (साढे नौ लाख रुपैयाँ बढी) ठगी गरेको आरोपमा नेपाली बाबुछोरा पक्राउ परेका छन् ।
पक्राउ पर्नेमा ४४ वर्षीय बुबा र २६ वर्षीय छोरा रहेका छन् । उनीहरूलाई जापान प्रहरीले २४ जुनमा पक्राउ गरेको त्यहाँको स्थानीय सञ्चारमाध्यम निप्पोन न्युज २४ जापानले उल्लेख गरेका छन् ।
प्रहरीका अनुसार उनीहरूले सुरुमा ओहतानीको तस्बिर प्रयोग गरेर नक्कली फेसबुक आईडी बनाएर वृद्धालाई फ्रेन्ड रिक्वेस्ट पठाएका थिए । त्यसपछि ‘लाइन’ एपमार्फत पनि सम्पर्क गर्दै आफूलाई ओहतानीको रूपमा चिनाएका थिए ।
मेसेजमार्फत वृद्धालाई ‘म विश्वकै उत्कृष्ट खेलाडी हुँ । मेरो बीमा शुल्क धेरै छ । म करोडौं येन प्रिमियम तिर्छु, तर त्यो पर्याप्त छैन । कृपया मेरो लागि १० लाख येन सहयोग गर्नुहोस्’ भन्दै अनुरोध गरेका थिए ।
विश्वास जित्नका लागि उनीहरूले वृद्धालाई ‘म टोकियो आउँछु र सबै रकम फिर्ता गर्छु’ भन्ने आश्वासन समेत दिएको जापानी मिडियाले जनाएका छन् । त्यसपछि २६ वर्षीय छोराले वृद्धाको अपार्टमेन्टमै पुगेर १० लाख येन नगद बुझेका थिए ।
उनीहरूले वृद्धाबाट थप रकम ठगी गरेको प्रहरीको आशंका छ । प्रहरीका अनुसार पक्राउ परेका बाबुछोराले आफूमाथि लागेको ठगीको आरोप स्वीकार गरिसकेका छन् ।
वार्षिक १५.१ अर्ब येन आम्दानी भएका ओहतानीले १० लाख येन सहयोग माग्नु अस्वाभाविक देखिएको भन्दै पीडित वृद्धाले प्रहरीमा उजुरी दिएकी थिइन् ।
