राष्ट्रिय परीक्षा बोर्डले कक्षा १० को माध्यमिक शिक्षा परीक्षा (एसइई) को नतिजा असार तेस्रो साता सार्वजनिक गर्ने तयारी गरेको छ।
बोर्डका अनुसार विद्यालय तहका शिक्षकहरू आन्दोलनमा उत्रिएपछि उत्तरपुस्तिका परीक्षण प्रक्रिया प्रभावित भएकाले यसपटक नतिजा गत वर्षको तुलनामा ढिलो हुने भएको हो।
अहिले भने उत्तरपुस्तिका परीक्षण अन्तिम चरणमा पुगेको बोर्डले जनाएको छ।
यसअघि बोर्डले परीक्षा सकिएको तीन महीनाभित्र नतिजा प्रकाशित गर्ने योजना बनाएको थियो। तर नेपाल शिक्षक महासङ्घको आन्दोलन र काठमाडौं केन्द्रित विरोध प्रदर्शनका कारण उत्तरपुस्तिका परीक्षण झन्डै एक महीनापछि मात्र सुरू भएको थियो।
नतिजा प्रकाशित भएलगत्तै विद्यार्थीहरूले बोर्डको आधिकारिक वेबसाइट र एसएमएस तथा मोबाइल एपमार्फत नतिजा हेर्न सक्ने बोर्डले जनाएको छ।
एसइई परीक्षा गत ७ चैतदेखि सञ्चालन भएको थियो । परीक्षामा नियमिततर्फ ४ लाख ३१ हजार ४६६ र ग्रेडवृद्धितर्फ ६७ हजार ७१५ गरी जम्मा ४ लाख ९९ हजार १८३ विद्यार्थीहरू सहभागी थिए ।
