प्रहरी हिरासतमा रहेका ममता काफ्लेका श्रीमान नरेश भट्टलाई धरौटीमा रिहा गर्ने नगर्नेभन्नेबारे सोमबार सुुनुवाई हुने भएको छ । अदालतको रेकर्ड अनुसार सोमबार विहान साढे ८ बजेका लागि तोकिएको सुनुवाईमा धरौटीमा रिहा गर्ने नगर्ने भन्नेबारे निर्णय हुनेछ भने धरौटीमा रिहा गर्ने भएमा कति धरौटी तोक्ने भन्नेबारे पनि निर्णय हुनेछ ।

उक्त सुनुवाईमा पनि नरेशलाई भौतिक रुपमा नै उपस्थीत गराइनेछ । त्यसपछि अर्को सुनुवाई अक्टोबर २४ का लागि तय गरिएको छ ।

प्रिन्स विलियम काउन्टीका अभियोजकले शुक्रबार भएको सुनुवाईमा यो मुद्दामा थप विवरणहरु दिएका थिए । नरेशले आफ्नो टेस्ला बेचेको, सुटकेसहरू प्याक गरेको र आफ्नी श्रीमती बेपत्ता भएपछि आफ्नो घर बेच्ने बारे अरूसँग कुरा गरेको विवरणहरु अदालतमा पेश गरिएको छ ।

अदालती कागजातमा ३० जुलाई २०२४ वा त्यसको आसपासमा आरोपी नरेशले आफ्नी श्रीमती ममताको हत्या गरेको र घटना उनकै निवासमा भएको उल्लेख छ । अनुसन्धानको क्रममा उनको मृत्युसँग मिल्दोजुल्दो डिजिटल र फोरेन्सिक प्रमाणहरूको पर्याप्त मात्रा बरामद भएको रिपोर्टमा जनाइएको छ ।

उनीविरुद्ध शव लुकाएको सम्बन्धमा छैठौं श्रेणीको अपराधको अभियोग लगाइएको छ । भर्जिनियामा यो अभियोगमा कम्तीमा १ बर्षदेखि ५ बर्षसम्म जेल सजाय हुनसक्ने प्रावधान रहेको छ ।

प्रहरीले बिहीबार बिहान नरेशलाई पक्राउ गरेपछि विना धरौटी हिराशतमा राखिएको छ ।