टर्कीको कायसेरी शहरस्थित एक अदालतले सामाजिक सञ्जालमा गरिएको ‘लाइक’ जस्ता डिजिटल क्रियाकलापलाई पनि वैवाहिक विश्वासघात वा वैवाहिक सम्बन्ध बिगार्ने कार्यको रूपमा मान्न सकिने महत्त्वपूर्ण फैसला सुनाएको छ।
स्थानीय सञ्चारमाध्यमका अनुसार, एक दम्पतीबीच चलिरहेको विवाह विच्छेद सम्बन्धी मुद्दामा अदालतले फेसबुक वा इन्स्टाग्राममा अरू व्यक्तिको सामग्री लाइक गर्नु पति–पत्नीबीचको निष्ठा र विश्वासमाथि आघात पुर्याउने कार्य हुने निष्कर्ष निकालेको हो।
अदालतले आदेशमा उल्लेख गर्दै भनेको छ, “यदि सामाजिक सञ्जालमा गरिएको ‘लाइक’ वा प्रतिक्रिया वैवाहिक विश्वाससँग प्रत्यक्ष सम्बन्धित छ भने, यसलाई विवाह विच्छेदको आधारका रूपमा प्रस्तुत गर्न सकिन्छ।”
कायसेरी अदालतको यो निर्णयलाई टर्कीमा पहिलो डिजिटल–नैतिक निर्णय मानिएको छ, जसले अबदेखि सामाजिक सञ्जालका गतिविधि वैवाहिक विवादका मुद्दामा ठोस कानुनी प्रमाण बन्ने मार्ग खोलिदिएको छ।
कानुनी विश्लेषकहरूका अनुसार, पछिल्ला वर्षहरूमा अत्यधिक सामाजिक सञ्जाल सक्रियता, गोप्य च्याट, अनुचित मेसेजिङ र अनलाइन सम्बन्ध विवाह टुट्ने प्रमुख कारण बनेका छन्। नयाँ फैसलाले यस्ता डिजिटल व्यवहारलाई अदालतले अब ‘निजी गतिविधि’ भनेर पन्छाउन नसक्ने स्पष्ट संकेत दिएको छ।
यस निर्णयपछि टर्कीमा आउने हजारौँ वैवाहिक मुद्दामा सामाजिक सञ्जालको गतिविधि छानबिनको मुख्य आधार बन्ने विशेषज्ञहरूको अनुमान छ।
