ओखलढुंगा – नेकपा एमालेको एघारौं राष्ट्रिय महाधिवेशनका लागि ओखलढुंगाबाट प्रतिनिधि छनोट गर्दा सबै विजयी उम्मेदवार ईश्वर पोख्रेल पक्षबाट निस्केका छन्। शनिबार सम्पन्न मतदान प्रक्रियामा पोख्रेल पक्षका नेताहरूले स्पष्ट बहुमतसहित प्रतिनिधि बन्न सफल भएका हुन्।
ओखलढुंगाबाट महाधिवेशनमा प्रतिनिधित्व गर्ने १२ जना उम्मेदवारमध्ये खुलातर्फ अम्बिरबाबु गुरुङ, ज्ञानबहादुर खड्का, कमलप्रसाद न्यौपाने, अशोक थापा, राजीव कटवाल र केदारबाबु बस्नेत विजयी भएका छन्। महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ निर्वाचित भएका छन् भने युवातर्फ टिकाराम धमला र दलिततर्फ ज्यानु कालिकोटे प्रतिनिधि चयन भएका छन्।
जिल्ला नेतासँग निकट सम्बन्ध भएका यी सबै विजयी प्रतिनिधिहरूले महाधिवेशनमा ईश्वर पोख्रेलको पक्षमा मतदान गर्ने तय छ। अम्बिर गुरुङले पोखरेललाई ओखलढुंगामै जन्मिएका नेता भएको भन्दै केन्द्रमा अध्यक्ष पदका लागि समर्थन गर्नुपर्ने तर्क अघि सारेका थिए।
प्रतिनिधि छनोटमा १२ स्थानका लागि कुल ४१ उम्मेदवार रहेका थिए। उम्मेदवारहरूबीच सहमति नजुटेपछि निर्वाचन कमिटीले मतदानमार्फत प्रतिनिधि छानेको निर्वाचन कमिटी प्रमुख सोभितमान गुरुङले बताए। सो मतदानमा जम्मा १५१८ मत खसेको थियो।
ओखलढुंगाको यस नतिजाले आगामी महाधिवेशनमा ईश्वर पोख्रेल पक्षको प्रभावलाई थप बलियो बनाउने अनुमान गरिएको छ।
